හොරණ පාසලක්‌ අසල කුඩු විකුණමින් සිටියදී
කුඩු ජාවාරම්කරුවෝ සිවුදෙනෙක්‌ කොටුවෙති
කුඩු ජාවාරම්කරුවෝ සිවුදෙනෙක්‌ කොටුවෙති
හොරණ ප්‍රසිද්ධ පාසලක්‌ ආසන්නයේ මත්කුඩු අලෙවි කරමින් සිටි සිල්ලර කඩ හිමියකු සහ ඔහුගෙන් මත්කුඩු මිලදී ගැනීමට පැමිණ සිටි ජාවාරම්කරුවන් තිදෙනකු අත්අඩංගුවට ගැනීමට පානදුර වලාන දූෂණ මර්දන ඒකකය පෙරේදා (06 වැනිදා) සමත් විය.
මෙම සැකකාර සිල්ලර කඩ හිමියා අත්අඩංගුවට ගන්නා අවස්‌ථාවේ ඔහු සන්තකයේ මත්කුඩු මිලිග්‍රෑම් 1220 ක්‌ තිබී අත්අඩංගුවට ගත් බව ද එම ඒකකය කියයි.
මෙම සිල්ලර කඩ හිමියා අදාළ මත්කුඩු පාසල් සිසුන් ඉලක්‌ක කර අලෙවි කර ඇතැයි හෙළි වූ බව පොලිසිය කියයි.
සිල්ලර කඩහිමියා අදාළ මත්කුඩු කොළඹ ප්‍රදේශයෙන් රැගෙන විත් පැකට්‌ කර අලෙවි කරන බව පොලිස්‌ පරීක්‍ෂණවලින් හෙළිවිය.
සහකාර පොලිස්‌ අධිකාරි ලූෂන් සූරියබණ්‌ඩාර ගේ උපදෙස්‌ මත පානදුර වලාන දූෂණ මර්දන ඒකකයේ ස්‌ථානාධිපති පොලිස්‌ පරීක්‍ෂක දුමින්ද බුද්ධික බාලසූරිය ගේ උපදෙස්‌ මත නිලධාරීහු කණ්‌ඩායමක්‌ මෙම වැටලීම සඳහා සහභාගි වූහ.
Post a Comment