මතක තියාගන්න මම එනවා...

මම ජනාධිපතිවරණයට තුන්වැනි වරටත් ඉදිරිපත් වෙනවා. මතක තියාගන්න ඒ වගේම දිනනවා. මහින්දට ඉදිරිපත් වෙන්න බැහැ කියන උදවියට ප්‍රශ්නයක් තිබෙනවා නම් එය උසාවි ගිහින් විසදා ගත්තාට කමක් නැතැයි ජනාධිපති මහින්ද රාජපක්ෂ  ඉකුත් සති අන්තයේ (10දා) පොල්ගහවෙල පැවැති ජන හමුවේදී ප්‍රකාශ කෙළේය. පොදු අපේක්ෂකයා මමයි. අපේ සන්ධානයේ පක්ෂ 13ක නායකයෝ ඉන්නවා. ඉතින් මට වඩා හොඳ පොදු අපේක්ෂකයෙක් තවත් ඉන්නවා දැයි ජනාධිපති රාජපක්ෂ  ප්‍රශ්න කෙළේය.


විපක්ෂය 28 වතාවක් මැතිවරණවලට ඉල්ලා පැරැදුණා. විපක්ෂ නායකට 29 වැනි වතාවටත් පරදින්න ඡන්දෙ ඉල්ලන්න පුළුවන් නම් මට තුන්වැනි වරටත් දිනන්න ඉල්ලන්න නීතියෙන් බැහැ කීම විහිළු කතාවකැයි ජනාධිපතිවරයා පැවැසීය.
පොල්ගහවෙල ප්‍රාදේශීය සභාවේ නව ගොඩනැඟිල්ල ජනතා අයිතියට පත් කිරීමෙන් අනතුරුව පොල්ගහවෙල නගර සභා පිටියේ පැවැති ජනහමුවේදී ජනාධිපතිවරයා මෙසේද පැවැසීය.


අපි සංවර්ධන වැඩ කරගෙන යද්දී අපි ගැන වෛරයෙන් කතා කරනවා. මම නම් කාටවත් අපහාස කරන්න ඇඟිල්ල දික් කරන්න යන්නෙ නැහැ. මම දැක්කා 'දැන් රට ආණ්ඩු කරන්නෙ බයියෙක්' කියනවා සොයා බැලුවාම ඒක කියාපු හාදයත් අපේ ගම් කිට්ටුව කෙනෙක්. අධිරාජ්‍යවාදී රදල ගති ඉස්මතු කරන්න මේ අය තවම වෑයම් කරනවා.